Home / တိုင်းဒေသကြီးအစိုးရအဖွဲ့နှင့် ဌာနဆိုင်ရာများ / ၁၃၈၀ ပြည့်နှစ် မြန်မာ့ရိုးရာယဉ်ကျေးမှုမဟာသင်္ကြန်ပွဲတော် သာယာဝတီခရိုင် ဗဟိုမဏ္ဏပ်ဖွင့်ပွဲအခမ်းအနား စည်ကားသိုက်မြိုက်စွာကျင်းပ

၁၃၈၀ ပြည့်နှစ် မြန်မာ့ရိုးရာယဉ်ကျေးမှုမဟာသင်္ကြန်ပွဲတော် သာယာဝတီခရိုင် ဗဟိုမဏ္ဏပ်ဖွင့်ပွဲအခမ်းအနား စည်ကားသိုက်မြိုက်စွာကျင်းပ

ဧပြီ ၁၃ (သာယာဝတီ)

========================

ဧပြီလ(၁၃)ရက်နေ့ နံနက်(၉)နာရီက ပဲခူးတိုင်းဒေသကြီး သာယာဝတီခရိုင်သာယာဝတီမြို့၌ ၁၃၈၀ ပြည့်နှစ် မြန်မာ့ရိုးရာယဉ်ကျေးမှု မဟာသင်္ကြန်ပွဲတော် ဗဟိုမဏ္ဏပ် ဖွင့်ပွဲအခမ်းအနားသို့ ပဲခူးတိုင်းဒေသကြီး ဝန်ကြီးချုပ်၊ လွှတ်တော်ဥက္ကဋ္ဌ၊ အစိုးရအဖွဲ့ဝန်ကြီးများ၊ တိုင်းဒေသကြီးအဆင့် ညွှန်ကြားရေးမှူးများ တက်ရောက်သည်။
ရှေးဦးစွာ ပဲခူးတိုင်းဒေသကြီး ဝန်ကြီးချုပ် ဦးဝင်းသိန်းက ၁၃၈၀ ပြည့်နှစ် မြန်မာ့ရိုးရာမဟာသင်္ကြန်အား ရိုးရာအစဉ်အလာနှင့်အညီ အတာအိုးဖြင့်ကြိုဆိုကာ ပဲခူးတိုင်းဒေသကြီးတွင် နှစ်စဉ်ခရိုင်လိုက် ကျင်းပပြုလုပ်ရာ ယခုနှစ်မှာတော့ သာယာဝတီခရိုင်တွင် ကျင်းပပြုလုပ်ခြင်းဖြစ်ကြောင်း၊ ပဲခူးတိုင်းဒေသကြီးနှင့် သာယာဝတီခရိုင်အတွင်းရှိ ပြည်သူများ အားလုံးသည် မင်္ဂလာရှိသော နှစ်သစ်ချိန်ခါတွင် နှစ်ဟောင်းမှ အခက်အခဲများ၊ ကိုယ်စိတ်နှစ်ပါးတွင် တွယ်ညှိနေတတ်သော အညစ်အကြေးများကို ချေဖြတ်ပြီး လူသစ်စိတ်သစ် အားမာန်သစ်များဖြင့် မြန်မာနှစ်သစ်ကူးအား လှိုက်လှိုက်လှဲလှဲ ကြိုဆိုကြစေလိုကြောင်း အမှာစကားပြောကြားသည်။
ထို့နောက် ပဲခူးတိုင်းဒေသကြီးအစိုးရအဖွဲ့ သာယာဝတီခရိုင် မဟာသင်္ကြန်ဗဟိုမဏ္ဏပ်အား ဝန်ကြီးချုပ် ဦးဝင်းသိန်း၊ လွှတ်တော်ဥက္ကဋ္ဌ ဦးခင်မောင်ရင်၊ ဝန်ကြီး ဦးအောင်ဇော်နိုင်၊ ခရိုင်အုပ်ချုပ်ရေးမှူး ဦးအောင်ချိုဦး၊ ပြည်သူ့လွှတ်တော်ကိုစားလှယ် ဦးအောင်မြင့်တို့က ဖဲကြိုးဖြတ်ဖွင့်လှစ်ပေးကြသည်။
ယင်းနောက် ပဲခူးတိုင်းဒေသကြီးအစိုးရအဖွဲ့ ဝန်ကြီးချုပ်၊ လွှတ်တော်ဥက္ကဋ္ဌ၊ အစိုးရအဖွဲ့ဝန်ကြီးနှင့် တာဝန်ရှိသူများသည် အတာရေပက်ဖျန်း၍ အတာသင်္ကြန်အား ကြိုဆိုကြပြီး သာယာဝတီခရိုင်အတွင်းရှိ ယိမ်းအဖွဲ့များက မြူမှောင်ဝေကင်း၊ မန်းတောင်ရိပ်ခို၊ သင်္ကြန်မိုးအကများဖြင့် လည်းကောင်း၊ ဧည့်သည်တော် ရုပ်ရှင်သရုပ်ဆောင်များက ခေတ်ပေါ်သီချင်းများဖြင့် ဖျော်ဖြေပေးကြသည်။
သာယာဝတီခရိုင်အတွင်းမှ ယိမ်းအဖွဲ့(၁၇)ဖွဲ့ ပါဝင်ကပြဖျော်ဖြည်မှာဖြစ်ပြီး၊ နိုင်ငံကျော်ရုပ်ရှင်သရုပ်ဆောင်များ အဆိုတော်များလည်း ပါဝင်ဖျော်ဖြေသွားမည်ဖြစ်ကြောင်း သိရသည်။