ပဲခူးမြို့နယ်အတွင်း အခြေခံပညာကျောင်းများ အေးချမ်းစွာ ဖွင့်လှစ်သင်ကြားနေမှုအား တိုင်းဒေသကြီး ဝန်ကြီးချုပ် ဦးမျိုးဆွေဝင်း သွားရောက်ကြည့်ရှုအားပေး

ပဲခူး ဇွန် ၂

=================

          ပဲခူးမြို့နယ်အတွင်း အခြေခံပညာကျောင်းများ အေးချမ်းစွာ ဖွင့်လှစ်သင်ကြားနေမှုအား ဇွန်လ (၂)ရက်နေ့၊ နံနက်ပိုင်းက တိုင်းဒေသကြီး ဝန်ကြီးချုပ် ဦးမျိုးဆွေဝင်း သွားရောက်ကြည့်ရှုအားပေးခဲ့သည်။

          ရှေးဦးစွာ တိုင်းဒေသကြီး ဝန်ကြီးချုပ် ဦးမျိုးဆွေဝင်းသည် ပဲခူးမြို့၊ အမှတ်(၁)အခြေခံပညာ အထက်တန်းကျောင်းသို့ ရောက်ရှိခဲ့ပြီး ကျောင်းသား/ကျောင်းသူများ အေးချမ်းပျော်ရွှင်စွာ ပညာသင်ကြား နေမှုအား ကြည့်ရှုအားပေးခဲ့ရာ တိုင်းဒေသကြီး ပညာရေးမှူး ဦးစိုးလွင်က ကျောင်းအပ်လက်ခံမှု၊ ကျောင်း တက်ရောက်မှု အခြေအနေများအား ရှင်းလင်းတင်ပြခဲ့သည်။

          ထို့နောက် တိုင်းဒေသကြီး ဝန်ကြီးချုပ်က စာသင်ကျောင်းအလိုက် စာသင်ခုံနှင့် စာသင်ခန်းများ ပြန်လည်ပြုပြင်ရန်၊ ခေတ်မီကလေးကစားကွင်း ဖြည့်ဆည်းပေးရန်၊ ကျောင်းအတွင်း သန့်ရှင်းသပ်ရပ်စေရေး နှင့် ရေစီးရေလာကောင်းမွန်စေရေး ဆောင်ရွက်ရန်၊ ကျောင်းတွင်းဘက်စုံသုံးခန်းမများ ပြန်လည်ပြုပြင်ပေး ရန်နှင့် ကျောင်းရှေ့ ယာဉ်အန္တရာယ် လမ်းအန္တရာယ်ကင်းရှင်းစေရေး လူကူးမျဉ်းကြားများ သိသာထင်ရှားစွာ ရှိစေရေး ပြင်ဆင်ဆောင်ရွက်ရန် တာဝန်ရှိသူများအား လမ်းညွှန်မှာကြားခဲ့သည်။

          အလားတူ တိုင်းဒေသကြီး ဝန်ကြီးချုပ်နှင့်အဖွဲ့သည် ပဲခူးမြို့၊ အမှတ်(၃)အခြေခံပညာအထက်တန်း ကျောင်းနှင့် အမှတ်(၅)အခြေခံပညာအထက်တန်းကျောင်းများသို့ သွားရောက်၍ ကျောင်းသား/ကျောင်းသူ များ အေးချမ်းပျော်ရွှင်စွာ ပညာသင်ကြားနေမှုတို့အား ကြည့်ရှုအားပေးခဲ့သည်။

          ပဲခူးတိုင်းဒေသကြီးအတွင်း အခြေခံပညာစာသင်ကျောင်း စုစုပေါင်း(၄၇၃၀)ကျောင်း ဖွင့်လှစ် သင်ကြားလျက်ရှိပြီး အပ်နှံရမည့်ဦးရေ(၇၅၈၆၄၂)ဦး၊ တက်ရောက်ဦးရေ (၇၁၅၅၉၄)ဦးရှိသဖြင့် ကျောင်းတက် ရောက်မှုသည် (၉၄.၃၃)ရာခိုင်နှုန်း တက်ရောက်သင်ကြားလျက်ရှိကြောင်း သိရှိရသည်။

          ဆက်လက်၍ တိုင်းဒေသကြီး ဝန်ကြီးချုပ် ဦးမျိုးဆွေဝင်းသည် ပဲခူးမြို့၊ နာရီစင်ပန်းခြံ ပြန်လည်အဆင့် မြှင့်တင်နေမှုအား ကြည့်ရှုစစ်ဆေးခဲ့ပြီး သတ်မှတ်ကာလအတွင်း စံချိန်စံညွှန်းနှင့်အညီ အချိန်မီပြီးစီးရေး တာဝန်ရှိသူများအား လမ်းညွှန်မှာကြားခဲ့ကြောင်း သတင်းရရှိသည်။