သာယာဝတီခရိုင်အတွက် လက်ဆွဲမျိုးစေ့ချကိရိယာ(Drum Seeder) လွှဲပြောင်းပေးအပ်ပွဲ ကျင်းပပြုလုပ်

ပဲခူး နိုဝင်ဘာ ၃၀

          သာယာဝတီမြို့၊ ဆရာစံခန်းမ၌ ယမန်နေ့၊ မွန်းလွဲပိုင်းက သာယာဝတီခရိုင်အတွက် လက်ဆွဲ မျိုးစေ့ချကိရိယာ(Drum Seeder) လွှဲပြောင်းပေးအပ်ပွဲ ကျင်းပပြုလုပ်ခဲ့ရာ ပဲခူးတိုင်းဒေသကြီး ဝန်ကြီးချုပ် ဦးမျိုးဆွေဝင်း တက်ရောက်ချီးမြှင့်ခဲ့သည်။

          ရှေးဦးစွာ ပဲခူးတိုင်းဒေသကြီး ဝန်ကြီးချုပ် ဦးမျိုးဆွေဝင်းက ပဲခူးတိုင်းဒေသကြီးအတွင်း မြို့ပြနှင့် ကျေးလက် ဟန်ချက်ညီညီဖွံ့ဖြိုးတိုးတက်စေရေး ကြိုးစားဆောင်ရွက်လျက်ရှိသလို ၂၀၂၄ ခုနှစ်၊ လူဦးရေ နှင့် အိမ်အကြောင်းအရာသန်းခေါင်စာရင်းအရ ကျေးလက်နေလူဦးရေသည် ၇၅ ရာခိုင်နှုန်းကျော်ရှိသဖြင့် ကျေးလက်နေပြည်သူများ၏ လူမှုစီးပွားဘဝများ ပိုမိုဖွံ့ဖြိုးတိုးတက်အောင် အရှိန်အဟုန်ဖြင့် အလေးထား ဖြည့်ဆည်းဆောင်ရွက်ပေးလျက်ရှိကြောင်း၊ ကျေးလက်နေပြည်သူများသည် စိုက်ပျိုးရေးနှင့် မွေးမြူရေးကို အဓိကထားလုပ်ကိုင်နေကြသူများဖြစ်ကြောင်း၊ စိုက်ပျိုးရေးကဏ္ဍဖြင့် တောင်သူလယ်သမားများ၏ လူမှု စီးပွားဘဝများ မြှင့်ပေးနိုင်ရေးသည် စိုက်ပျိုးသီးနှံအလိုက် ပန်းတိုင်အထွက်နှုန်းရရှိရေးသည် အလွန်အရေး ကြီးပြီး လိုအပ်သည့် မျိုး၊ မြေ၊ ရေ၊ နည်း ပြည့်စုံကောင်းမွန်အောင် ဘက်ပေါင်းစုံမှ ဖြည့်ဆည်းဆောင်ရွက် ပေးလျက်ရှိကြောင်း၊ ယခုအခါ ကျေးလက်ဒေသများတွင် လုပ်သားရှားပါးမှု၊ တစ်ဧကစိုက်ပျိုးစရိတ် ကုန်ကျမှုများပြားခြင်းစသည်တို့ကို ဖြေရှင်းဆောင်ရွက်ပေးနိုင်ရန်အတွက်  ပဲခူးတိုင်းဒေသကြီး အတွင်းမှ ထုတ်လုပ်သည့် Drum Seeder (၁)လက်လျှင် ငွေကျပ်(၂)သိန်းနှုန်းဖြင့် ဖြန့်ဖြူးပေးသွားမှာဖြစ် ကြောင်းနှင့် စက်မှုလယ်ယာကူးပြောင်းရေးအတွက် နိုင်ငံစီးပွားမြှင့်တင်ရေးရန်ပုံငွေမှ ထုတ်လုပ်ပေး အပ်ထားတဲ့ လက်ဆွဲမျိုးစေ့ချကိရိယာ (Drum Seeder) များကို လယ်ယာလုပ်ငန်းခွင်တွင် အကျိုးရှိစွာ အသုံးချနိုင်ရေး ကြိုးစားဆောင်ရွက်သွားကြစေလိုကြောင်း ပြောကြားခဲ့သည်။

          ထို့နောက် ပဲခူးတိုင်းဒေသကြီး ဝန်ကြီးချုပ် ဦးမျိုးဆွေဝင်းက သာယာဝတီခရိုင်စီမံခန့်ခွဲရေးနှင့် အုပ်ချုပ်ရေးကော်မတီ ဥက္ကဋ္ဌထံ လက်ဆွဲမျိုးစေ့ချကိရိယာ (Drum Seeder) (၁၂၀၀)လက်အား ပထမအကြိမ်အဖြစ် လွှဲပြောင်းပေးအပ်ခဲ့သည်။

          ယင်းနောက် တောင်သူလယ်သမားများ၏ လူမှုစီးပွားဘဝ ဖွံ့ဖြိုးတိုးတက်ရေးအတွက် အလေးထား ဆောင်ရွက်ပေးအပေါ် ဒေသခံတောင်သူတစ်ဦးက ကျေးဇူးတင်စကား ပြန်လည်ပြောကြားခဲ့သည်။ ၎င်းနောက် တိုင်းဒေသကြီး ဝန်ကြီးချုပ်က တက်ရောက်လာသည့် တောင်သူများအား ရင်းရင်းနှီးနှီး နှုတ်ဆက်စကားပြောကြားကာ လွှဲပြောင်းပေးအပ်သည့် လက်ဆွဲမျိုးစေ့ချ ကိရိယာ(Drum Seeder)များ အား လှည့်လည်ကြည့်ရှုအားပေးခဲ့ကြောင်း သတင်းရရှိသည်။