ပဲခူးတိုင်းဒေသကြီး ဝန်ကြီးချုပ် ဦးမျိုးဆွေဝင်း မြို့ပြသန့်ရှင်းသာယာလှပရေးလုပ်ငန်းများ ကွင်းဆင်း ကြည့်ရှုစစ်ဆေး

ပဲခူး ဇန်နဝါရီ ၂၈

          ပဲခူးတိုင်းဒေသကြီးအစိုးရအဖွဲ့ ဝန်ကြီးချုပ် ဦးမျိုးဆွေဝင်းသည် ဇန်နဝါရီလ ၂၈ ရက်နေ့၊ နံနက်ပိုင်း က ပဲခူးမြို့အတွင်း မြို့ပြသန့်ရှင်းသာယာလှပရေးလုပ်ငန်းများ ကွင်းဆင်းကြည့်ရှုစစ်ဆေးခဲ့သည်။

          ရှေးဦးစွာ ပဲခူးတိုင်းဒေသကြီးအစိုးရအဖွဲ့ ဝန်ကြီးချုပ် ဦးမျိုးဆွေဝင်းသည် ပဲခူးမြို့အလယ်ရှိ ပဲခူးမြစ် ကူးတံတား လှပတင့်တယ်စေရေးနှင့် ကမ်းပြိုမှုကာကွယ်နိုင်ရေး Bored Pile အခြေပြု ကျောက်/ကွန်ကရစ် မြေထိန်းနံရံတည်ဆောက်နေမှုအား ကွင်းဆင်းကြည့်ရှုစစ်ဆေးခဲ့ပြီး မြေထိန်းနံရံများအား မြစ်ရေတိုက်စားမှု ခံနိုင်စေရေး သတ်မှတ်ဒီဇိုင်းများအတိုင်းတည်ဆောက်ရန်၊ တည်ဆောက်ရေးလုပ်ငန်းများ စံချိန်စံညွှန်းနှင့် အညီ သတ်မှတ်ချိန်အတွင်း အချိန်မီပြီးစီးရေး အလေးထားဆောင်ရွက်ရန်နှင့် ပဲခူးမြစ်အား ရေစီးရေလာ ကောင်းမွန်စေရေး မြစ်ကြောင်းရှင်းလင်းခြင်းလုပ်ငန်းများ တစ်ပါတည်းဆောင်ရွက်သွားရန် တာဝန်ရှိသူများ အား လမ်းညွှန်မှာကြားခဲ့သည်။

          ထို့နောက် ပဲခူးတိုင်းဒေသကြီး ဝန်ကြီးချုပ်သည် ပဲခူးမြို့၊ ဥဿာမြို့သစ်ရှိ ယခင်က မြေနိမ့်ချိုင့်ဝှမ်း ဖြစ်နေသော သမိန်ဗရမ်းလမ်းအား (၄၀)ပေ အကျယ် မြေသားတာဘောင်ပြုလုပ်ခြင်း၊ ၂၆ ပေအကျယ် ကျောက်ခင်းခြင်း၊ ၂၄ ပေအကျယ် ကွန်ကရစ်ခင်း ခြင်းနှင့် (၆၀)ပေအကျယ် ကွန်ကရစ်ရေထုတ်ပြွန် တည်ဆောက်ခြင်းလုပ်ငန်း ဆောင်ရွက်နေမှုတို့အား ကွင်းဆင်းကြည့်ရှုစစ်ဆေးခဲ့ပြီး သတ်မှတ်လမ်းဒီဇိုင်းများ အတိုင်း အချိန်မီပြီးစီးရေး ဆောင်ရွက်သွားရန်နှင့် လမ်းပုခုံးသား အမာခံရရှိရေး စနစ်တကျဆောင်ရွက်သွား ရန် တာဝန်ရှိသူများအား လမ်းညွှန်မှာကြားခဲ့သည်။

          ယင်းနောက် တိုင်းဒေသကြီး ဝန်ကြီးချုပ်သည် ပဲခူးမြို့၊ ကျိုက်ပညာယျစေတီတော်ကြီးအနီး၌ (၆၄) နှစ်မြောက် တောင်သူလယ်သမားနေ့ စည်ကားသိုက်မြိုက်စွာကျင်းပမည့် နေရာသို့ရောက်ရှိခဲ့ပြီး တောင်သူ လယ်သမားများအတွက် အသိပညာပေးခြင်းနှင့် သရုပ်ပြခြင်းဆောင်ရွက်မည့် စားဖိုဆောင်စိုက်ခင်းနှင့် သီးနှံ မျိုးစုံစိုက်ခင်းများ ဆောင်ရွက်နေမှု၊ သီးနှံပြခန်းများ၊ စိုက်ပျိုးရေးနှင့် မွေးမြူရေးပြခန်းများ၊ MSMEs ပြခန်း တည်ဆောက်မည့် နေရာများသို့ ကွင်းဆင်းကြည့်ရှုခဲ့ကာ တာဝန်ရှိသူများအား လိုအပ်သည်များ လမ်းညွှန် မှာကြားခဲ့ကြောင်း သတင်းရရှိသည်။