၂ဝ၂၅ ခုနှစ်၊ တိုင်းဒေသကြီးနှင့်ပြည်နယ် ခြင်းလုံးပြိုင်ပွဲသို့ ဝင်ရောက်ယှဉ်ပြိုင်မည့် တိုင်းဒေသကြီးနှင့် ပြည်နယ်အသီးသီးမှ ပြိုင်ပွဲဝင်အသင်းများအား ကြိုဆိုဂုဏ်ပြုမိတ်ဆက်ခြင်း အခမ်းအနားကျင်းပ

ပဲခူး ဩဂုတ် ၃၀

       ပဲခူးမြို့၊ မြို့တော်ခန်းမ၌ ဩဂုတ်လ (၃၀)ရက်နေ့ နံနက်ပိုင်းက ၂ဝ၂၅ ခုနှစ်၊ တိုင်းဒေသကြီးနှင့် ပြည်နယ် ခြင်းလုံးပြိုင်ပွဲသို့ ဝင်ရောက်ယှဉ်ပြိုင်မည့် တိုင်းဒေသကြီးနှင့် ပြည်နယ်အသီးသီးမှ ပြိုင်ပွဲဝင် အသင်းများအား ကြိုဆိုဂုဏ်ပြုမိတ်ဆက်ခြင်း အခမ်းအနားကျင်းပပြုလုပ်ရာ ပဲခူးတိုင်းဒေသကြီး ဝန်ကြီးချုပ် ဦးမျိုးဆွေဝင်း တက်ရောက်ချီးမြှင့်ပေးခဲ့သည်။

          ရှေးဦးစွာ တိုင်းဒေသကြီးနှင့်ပြည်နယ်များမှ ခြင်းလုံးပြိုင်ပွဲသို့ ဝင်ရောက်ယှဉ်ပြိုင်မည့် တိုင်းဒေသကြီး/ ပြည်နယ်အသီးသီးမှ ပြိုင်ပွဲအသင်းများက အသင်းလိုက်မိတ်ဆက်ကြသည်။

        ထို့နောက် ပဲခူးတိုင်းဒေသကြီးအစိုးရအဖွဲ့ ဝန်ကြီးချုပ် ဦးမျိုးဆွေဝင်းက ယခုလို ၂၀၂၅ ခုနှစ် ၊ တိုင်းဒေသကြီးနှင့်ပြည်နယ် ခြင်းလုံးပြိုင်ပွဲအား ပဲခူးတိုင်းဒေသကြီး အနေဖြင့် အိမ်ရှင်အဖြစ် လက်ခံ ကျင်းပခွင့်ရရှိသည့်အတွက် ဂုဏ်ယူမိပါကြောင်း၊ တိုင်းဒေသကြီးနှင့် ပြည်နယ်မှာရှိသည့် အားကစား သမားများ၏ မတူကွဲပြားသည့် ကစားပုံ၊ ကစားဟန်နှင့် နည်းစနစ်များကို လေ့လာဖလှယ် ခွင့်ရရှိနိုင်စေခြင်း၊ မြေပြန့်ဒေသနှင့် တောင်ပေါ်ဒေသ မခွဲခြားဘဲ တိုင်းရင်းသားအချင်းချင်း ချစ်ကြည် ရင်းနှီးမှု ပိုမိုရရှိနိုင်စေခြင်းနှင့် ဒေသအသီးသီးမှ ပြိုင်ပွဲဝင်အားကစား သမားအနေဖြင့် ပဲခူးတိုင်း ဒေသကြီး၏ ယဉ်ကျေးမှု ဓလေ့စရိုက်၊ ဒေသန္တရဗဟုသုတများကို လေ့လာခွင့်ရရှိစေခြင်းစသည့် အကျိုး ကျေးဇူးများကို ရရှိစေနိုင်မှာဖြစ်ကြောင်း၊ ခြင်းလုံးအားကစားနည်းသည် နည်းစနစ်ကို အခြေခံပြီး တစ်ဦးချင်း ကျွမ်းကျင်မှု၊ လျင်မြန်ဖျတ်လတ်မှု၊ တစ်ဦးနှင့်တစ်ဦး စည်းလုံးညီညွတ်စွာ အပေးအယူမျှတမှု၊ သက်လုံနှင့်ကြံ့ခိုင်မှုတို့ပါ ပြည့်ဝဖို့လိုသည့် အားကစားနည်းဖြစ်သည့်အပြင် ပြိုင်ပွဲဝင်များအနေဖြင့် သတ်မှတ်ထားသော စည်းမျဉ်း/စည်းကမ်း ဥပဒေနှင့်အညီ လိုက်နာပြီး မိမိတို့၏ ပင်ကိုယ်အရည်အသွေး၊ ဖြတ်ထိုးဉာဏ်အပေါ် လျှပ်တစ်ပြတ်အသုံးချ၍ ယှဉ်ပြိုင်အနိုင်ယူ ကစားရသည့် ကစားနည်းတစ်ခုဖြစ်၍ မိမိတို့ ကိုယ်စားပြုသည့် တိုင်းဒေသကြီး/ပြည်နယ် အောင်နိုင်ရေးအတွက် ကြိုးစားသွားကြစေလို ကြောင်းနှင့် ပြိုင်ပွဲဝင်ကာလတစ်လျှောက်လုံး စိတ်ချမ်းသာ ပျော်ရွှင်စွာ ဝင်ရောက်ယှဉ်ပြိုင်နိုင်ရေး အဘက်ဘက်မှ ပြည့်စုံကောင်းမွန်စွာ စောင့်ရှောက်ပေးသွားမှာဖြစ် ကြောင်း ကြိုဆိုနှုတ်ခွန်းဆက်စကား ပြောကြားခဲ့သည်။

          ထို့နောက် အခမ်းအနားတက်ရောက်လာကြသည့် ဌာနဆိုင်ရာများ၊ ၂ဝ၂၅ ခုနှစ်၊ တိုင်းဒေသကြီးနှင့် ပြည်နယ် ခြင်းလုံးပြိုင်ပွဲသို့ ဝင်ရောက်ယှဉ်ပြိုင်မည့် တိုင်းဒေသကြီးနှင့် ပြည်နယ်အသီးသီးရှိ  ပြိုင်ပွဲဝင် အသင်းများမှ အဖွဲ့ခေါင်းဆောင်၊ အုပ်ချုပ်သူနည်းပြများ၊ အားကစားသမားများအား လက်ဖက်ရည်ပွဲဖြင့် တည်ခင်းဧည့်ခံခဲ့ကြောင်းသိရသည်။

         အဆိုပါ ၂ဝ၂၅ ခုနှစ်၊ တိုင်းဒေသကြီးနှင့်ပြည်နယ် ခြင်းလုံးပြိုင်ပွဲအား ပဲခူးတိုင်းဒေသကြီးက အိမ်ရှင်အဖြစ် စက်တင်ဘာလ(၁)ရက်နေ့မှ (၄)ရက်နေ့အထိ လက်ခံကျင်းပပြုလုပ်မည်ဖြစ်ပြီး တိုင်းဒေသကြီးနှင့် ပြည်နယ်အသီးသီးမှ  အမျိုးသား(၁၀)သင်း၊  အမျိုးသမီး(၇)သင်း ပါဝင်ယှဉ်ပြိုင်ကြ မည်ဖြစ်ကြောင်း သတင်းရရှိသည်။