၂၀၂၃-၂၀၂၄ ပညာသင်နှစ် ပဲခူးတက္ကသိုလ် မောင်မယ်သစ်လွင်ကြိုဆိုပွဲ အခမ်းအနားသို့ တိုင်းဒေသကြီး ဝန်ကြီးချုပ် တက်ရောက်ဖွင့်လှစ်

ပဲခူး ဇန်နဝါရီ ၁၆

==============

ပဲခူးတက္ကသိုလ်၌ ဇန်နဝါရီလ(၁၆)ရက်နေ့၊ နံနက်ပိုင်းက ၂၀၂၃-၂၀၂၄ ပညာသင်နှစ် ပဲခူးတက္ကသိုလ် မောင်မယ်သစ်လွင်ကြိုဆိုပွဲ အခမ်းအနားကျင်းပပြုလုပ်ခဲ့ရာ တိုင်းဒေသကြီး ဝန်ကြီးချုပ် ဦးမျိုးဆွေဝင်း တက်ရောက်ချီးမြှင့်ခဲ့သည်။

ရှေးဦးစွာ တိုင်းဒေသကြီး ဝန်ကြီးချုပ် ဦးမျိုးဆွေဝင်းက တက္ကသိုလ်တစ်ခုဆိုတာ နိုင်ငံရဲ့ တန်ဖိုးမဖြတ် နိုင်တဲ့ ရတနာတစ်ခုဖြစ်ပြီး သာယာဝပြော၍ ငြိမ်းချမ်းသော အနာဂတ်လူ့ဘောင်ကို တည်ထောင်နိုင်ဖို့ ထူးချွန် ထက်မြတ်ပြီး ပညာရည်ပြည့်ဝတဲ့ လူ့စွမ်းအားအရင်းအမြစ်တွေကို ဖော်ထုတ်ပေးနေသည့် နေရာတစ်ခုဖြစ် ကြောင်း၊ တက္ကသိုလ်တွင် ဘာသာရပ်ဆိုင်ရာ ပညာရပ်အသီးသီးကို ပို့ချသင်ကြားပေးရုံသာမက အကျင့် စာရိတ္တကောင်းမွန်တဲ့ ပညာတတ် နိုင်ငံ့သားကောင်းရတနာများကို မွေးထုတ်ပေးလျက်ရှိသည်နှင့်အညီ မောင်တို့/မယ်တို့အနေဖြင့် ဉာဏ်ရည်ထက်မြက်ပြီး စဉ်းစားတွေးခေါ်မှုမြင့်မားသော အသိပညာ အတတ်ပညာ ရှင်များဖြစ်အောင် ကြိုးစားကြစေလိုကြောင်း၊ တက္ကသိုလ်ရဲ့ လှုပ်ရှားမှုများဖြစ်သော အားကစား၊ စာပေ၊ ဂီတ အနုပညာ၊ ကြက်ခြေနီစတဲ့ ကဏ္ဍပေါင်းစုံမှာ မောင်မယ်တို့အားလုံး ဝါသနာပါရာအလိုက် ဆောင်ရွက်ရင်းမှ တစ်ယောက်နှင့်တစ်ယောက် ပူးပေါင်းဆောင်ရွက်တတ်မှု၊ စည်းလုံးမှု၊ ချစ်ခင်ရင်းနှီးမှုစသည့် အခြေခံစိတ်ဓါတ် ကောင်းများ တိုးတက်လာမှာဖြစ်ကြောင်း၊ မောင်မယ်များအနေဖြင့် ဖွံ့ဖြိုးတိုးတက်သော နိုင်ငံတော် တည်ဆောက်ရာမှာ ဗလငါးတန်နှင့် ပြည့်စုံပြီး ပညာရည်၊ လက်ရုံးရည်၊ နှလုံးရည်ပြည့်ဝပြီး အတွေးအခေါ် မှန်ကန်ရင့်ကျက်တဲ့ အနာဂါတ် ခေါင်းဆောင်များဖြစ်အောင် ကြိုးစားဆောင်ရွက်ရင်း မိမိတက္ကသိုလ် ကောင်းကျိုး၊ တိုင်းဒေသကြီးကောင်းကျိုး၊ နိုင်ငံ့ကောင်းကျိုးများအား တတ်စွမ်းသမျှ ကြိုစားဆောင်ရွက်ကြ စေလိုကြောင်း ကြိုဆိုနှုတ်ခွန်းဆက်စကား ပြောကြားခဲ့သည်။

ထို့နောက် ပဲခူးတက္ကသိုလ် ပါမောက္ခချုပ် ဆရာမကြီး ဒေါက်တာအေးအေးခိုင်က တက္ကသိုလ် အကြောင်း သိကောင်းစရာများအား မိတ်ဆက်ရှင်းလင်း ပြောကြားခဲ့သည်။ ၎င်းနောက် တက္ကသိုလ်တွင် သင်ကြားပို့ချသွားမည့် ဝိဇ္ဇာဘာသာရပ်(၈)ခုနှင့် သိပ္ပံဘာသာရပ်(၆)ခုတို့၏ သိမှတ်ဖွယ်ရာများအား သက်ဆိုင်ရာပါမောက္ခများက ရှင်းလင်းပြောကြားခဲ့ကြသည်။

ယင်းနောက် တက္ကသိုလ် ကျောင်းသား/သူများက “မြကျွန်းညိုညိုတက္ကသိုလ်”၊ “ထာဝရမြန်မာ”၊ ဗုဒ္ဓ ပူဇနိယ”၊“ရှမ်းနှစ်သစ်ကူးပွဲတော်”စသည့် တေးသီချင်းများဖြင့် ကပြဖျော်ဖြေတင်ဆက်ခဲ့ကြရာ တိုင်းဒေသကြီး ဝန်ကြီးချုပ် ဦးမျိုးဆွေဝင်းက ဂုဏ်ပြုဆုငွေများ ပေးအပ်ခဲ့သည်။

ထို့နောက် ပဲခူးတက္ကသိုလ်သို့ ပထမနှစ်တက်ရောက်သင်ကြားမည့် မောင်/မယ်များအား တိုင်းဒေသကြီး ဝန်ကြီးချုပ်နှင့် တာဝန်ရှိသူများက ရင်းရင်းနှီးနှီးလိုက်လံနှုတ်ဆက် အားပေးစကား ပြောကြားခဲ့ပြီး ဘာသာရပ်အလိုက် ခင်းကျင်းပြသထားသည့် သရုပ်ပြခန်းများအား လှည့်လည်ကြည့်ရှုအားပေးခဲ့ကြောင်း သတင်းရရှိသည်။