ပဲခူးတိုင်းဒေသကြီး ဝန်ကြီးချုပ် ဦးမျိုးဆွေဝင်း ပဲခူးမြို့အတွင်း ဒေသဖွံ့ဖြိုးရေးလုပ်ငန်းများ ကွင်းဆင်း ကြည့်ရှုစစ်ဆေး

February 15, 2026 တိုင်းဒေသကြီးအစိုးရအဖွဲ့နှင့် ဌာနဆိုင်ရာများ 14 Views

ပဲခူး ဖေဖော်ဝါရီ ၁၄

ပဲခူးတိုင်းဒေသကြီး ဝန်ကြီးချုပ် ဦးမျိုးဆွေဝင်းသည် ဖေဖော်ဝါရီလ ၁၄ ရက်နေ့၊ နံနက်ပိုင်းက ပဲခူးမြို့အတွင်း ဒေသဖွံ့ဖြိုးရေးလုပ်ငန်းများ ကွင်းဆင်းကြည့်ရှုစစ်ဆေးခဲ့သည်။

ရှေးဦးစွာ တိုင်းဒေသကြီး ဝန်ကြီးချုပ် ဦးမျိုးဆွေဝင်းသည် ပဲခူးမြို့၊ ဟံသာဝတီမြို့ဟောင်းကျုံး မြောက်ဘက်ခြမ်းမြေထိန်းနံရံကျောက်စီခြင်းနှင့် သံပန်းတပ်ဆင်ခြင်းလုပ်ငန်း ဆောင်ရွက်နေမှုအား ကွင်းဆင်းကြည့်ရှုခဲ့ပြီး ကျုံးအတွင်း ရေဝင်ရေထွက်စနစ် ကောင်းမွန်စေရေး၊ ကျုံးရေပြင်၌ ကြာပန်းများဖြင့် လှပတင့်တယ်စေရေး၊ တည်ဆောက်ရေလုပ်ငန်းများ သတ်မှတ်ကာလအတွင်း အချိန်မီပြီးစီးရေး ဆောင်ရွက်ရန် တာဝန်ရှိသူများအား လမ်းညွှန်မှာကြားခဲ့သည်။

ထို့နောက် တိုင်းဒေသကြီး ဝန်ကြီးချုပ်သည် နှစ်စဉ်ပဲခူးမြစ်ရေဝင်ရောက်သည့် ကျောက်ကြီးစုရပ်ကွက်၌ အလျား ၁၃၀ ပေ၊ အနံ ၃၀ ပေရှိ School Cum Shelter တည်ဆောက်နေမှုအား ကွင်းဆင်း ကြည့်ရှု စစ်ဆေးခဲ့ပြီး ဆောက်လုပ်ရေးလုပ်ငန်းစဉ် အဆင့်ဆင့်အား သက်ဆိုင်ရာတည်ဆောက်ရေးလုပ်ငန်း ကြီးကြပ်မှုကော်မတီက စစ်ဆေးရန်နှင့် သတ်မှတ်ကာလအတွင်း စံချိန်စံညွှန်းနှင့်အညီ အချိန်မီ ပြီးစီးရေး အလေးထားဆောင်ရွက်ရန် တာဝန်ရှိသူများအား လမ်းညွှန်မှာကြားခဲ့သည်။

ယင်းနောက် ပဲခူးမြို့၊ ကမ္ဘောဇသာဒီနန်းတော်ဝန်းအတွင်း ဘက်စုံအဆင့်မြှင့်တင်ရေး လုပ်ငန်းများ ဆောင်ရွက်နေမှုတို့အား ကွင်းဆင်းကြည့်ရှုစစ်ဆေးခဲ့ပြီး ပဲခူးမြို့အတွင်းပြည်တွင်း/ပြည်ပခရီးသွားလုပ်ငန်း ပိုမိုတိုးတက်စေရေးအတွက် အထင်ကရနေရာဖြစ်၍ သန့်ရှင်းသာယာလှပစေရေး၊ လာရောက်လေ့လာ လည်ပတ်သူများ စိတ်ချမ်းမြေ့စေရေး၊ ရှေးဟောင်းနန်းတွင်း သုံးပစ္စည်းများ ကြည့်ရှုနိုင်ရေး၊ အမှတ်တရ ပစ္စည်းအရောင်းဆိုင်များ စနစ်တကျဖွင့်လှစ်ရောင်းချနိုင်ရေး၊ Information Center များ ထားနိုင်ရေးနှင့် တည်ဆောက်ရေးလုပ်ငန်းခွင် အန္တရာယ်ရှင်းရေး ဆောင်ရွက်ရန် တာဝန်ရှိသူများအား လမ်းညွှန်မှာကြား ခဲ့သည်။ ၎င်းနောက် တိုင်းဒေသကြီး ဝန်ကြီးချုပ်သည် ဟံသာဝတီ မြို့ဟောင်း၊ အင်းဝတံခါးပေါက်အနီး မြို့ရိုးပြန်လည်တူးဖော် ထိန်းသိမ်းထားရှိမှု၊ မြို့ရိုးနှင့်ကျုံးကြား မြေယာရှုခင်းအလှ ဆောင်ရွက်နေမှုတို့အား ကွင်းဆင်းကြည့်ရှုစစ်ဆေးခဲ့ပြီး လိုအပ်သည်များ လမ်းညွှန် မှာကြားခဲ့သည်။

ဆက်လက်၍ ပဲခူးတိုင်းဒေသကြီး ဝန်ကြီးချုပ်သည် နန်းတော်ရာရပ်ကွက်အတွင်းရှိ ဥဿာမင်္ဂလာ ကန်တော်အား ကွင်းဆင်းကြည့်ရှုခဲ့ပြီး အများပြည်သူ ကျန်းမာရေးလေ့ကျင့်ခန်းသုံးပစ္စည်းများ ပြည့်စုံ ကောင်းမွန်မှုရှိစေရေးနှင့် ရေကန်ဘောင်ရှိသံပန်းအကာများ သေသပ်လှပခိုင်ခန့်မှုရှိစေရေး ဆောင်ရွက်ရန် တာဝန်ရှိသူများအား လမ်းညွှန်မှာကြားခဲ့သည်။ ၎င်းနောက် ရွှေအောင်ရွေးစေတီတော်၏ ကုန်းတော်ခိုင်ခန့် မှုရှိစေရေး၊ ရင်ပြင်တော်ဘက်စုံပြုပြင်မွမ်းမံနေမှုနှင့် ဓါတ်လှေခါးအသစ်တပ်ဆင်နိုင်ရေး ဆောင်ရွက်နေမှု တို့အား ကွင်းဆင်းကြည့်ရှုစစ်ဆေးခဲ့ပြီး ပွင့်လင်းရာသီအတွင်း တည်ဆောက်ရေးလုပ်ငန်းအားလုံး အချိန်မီ ပြီးစီးရေး ဆောင်ရွက်ရန် တာဝန်ရှိသူများအား လမ်းညွှန်မှာကြားခဲ့ကြောင်း သတင်းရရှိသည်။