ပဲခူးတိုင်းဒေသကြီးမှ မြေငလျင်ဒဏ်သင့်ဒေသများအတွက် ကူညီကယ်ဆယ်ရေးနှင့် ပြန်လည်ထူထောင်ရေး လုပ်ငန်းများ ဆောင်ရွက်ရန်အတွက် အလှူရှင်များက အလှူငွေများ ပေးအပ်လှူဒါန်း

ပဲခူး ဧပြီ ၄

          မြေငလျင်ဒဏ်သင့်ဒေသများအတွက် ကူညီကယ်ဆယ်ရေးနှင့် ပြန်လည်ထူထောင် ရေးလုပ်ငန်းများ ဆောင်ရွက်ရန်အတွက် အလှူရှင်များက အလှူငွေများ ပေးအပ်လှူ ဒါန်းခြင်းကို ဧပြီလ(၄)ရက်နေ့၊ နံနက်ပိုင်းက ပဲခူးတိုင်းဒေသကြီးအစိုးရအဖွဲ့ရုံး၊ တော်ဝင်ဟံသာအစည်းအဝေးခန်းမ၌ ကျင်းပပြုလုပ်ရာ ပဲခူးတိုင်းဒေသကြီး ဝန်ကြီးချုပ် ဦးမျိုးဆွေဝင်း၊ အစိုးရအဖွဲ့ဝင် ဝန်ကြီးများ၊ ဌာနဆိုင်ရာများ၊ စေတနာရှင် အလှူရှင်များ၊ ဖိတ်ကြားထားသူများ တက်ရောက်ခဲ့ကြသည်။

          ရှေးဦးစွာ တိုင်းဒေသကြီး ဝန်ကြီးချုပ် ဦးမျိုးဆွေဝင်းက မတ်လ(၂၈)ရက်နေ့၊ မြန်မာစံတော်ချိန် ၁၂ နာရီ ၅၀ မိနစ်ခန့်တွင် ရစ်(ခ်)တာစကေး ၇.၇ အဆင့်ရှိ အလွန်ပြင်းထန်သည့် မြေငလျင်လှုပ်ခတ်ခဲ့မှုကြောင့် မိမိတို့ပဲခူးတိုင်းဒေသကြီးတွင်လည်း ထိခိုက်ပျက်စီးမှုများဖြစ်ပေါ်ခဲ့ရကြောင်း၊ တိုင်းဒေသကြီးအတွင်း ငလျင် ဒဏ်ခံစားခဲ့ရသည့် ဒေသများသို့ ကွင်းဆင်းကြည့်ရှုစစ်ဆေးခဲ့ရာ ပြိုကျခဲ့သည့် အဆောက်အဦများသည် ယခင် အဆောက်အဦ အဟောင်းများဖြစ်ကာ ငလျင်ဒဏ်ခံ စံနှုန်းများနှင့်ကိုက်ညီမှုမရှိဘဲ သမားရိုးကျ ဆောက်လုပ် ထားသည်ကို တွေ့ရှိခဲ့ရကြောင်း၊ပဲခူးတိုင်းဒေသကြီးမှ ငလျင်ဒဏ်သင့် ဒေသများသို့ မတ်လ(၃၀)ရက်နေ့မှစတင်၍ ငါး၊ ကြက်ဥ၊ ဘဲဥ၊ ဟင်းသီးဟင်းရွက်မျိုးစုံ၊ အသင့်စားသောက် ဖွယ်ရာများ၊ ရေသန့်ဘူးများစသည့် ကျပ်သိန်း(၁၆၈၀)ကျော် ပေးပို့သည့်အပြင် ထိခိုက်ဒဏ်ရာရရှိသူများ အတွက် အသက်ကူ ကယ်ဆယ်နိုင်ရေး သွေးအလုံးပေါင်း(၄၄၀)ကျော်ကိုလည်း နေပြည်တော်သို့ အချိန်နှင့် တစ်ပြေးညီ ပေးပို့ကူညီပေးနိုင်ခဲ့ကြောင်း၊ ယခုကဲ့သို့ ငလျင်ဘေးဒဏ်သင့်ဒေသများ၌ ကူညီကယ်ဆယ်ရေး နှင့် ပြန်လည်ထူထောင်ရေးလုပ်ငန်းများ ဆောင်ရွက်နိုင်ရန်အတွက် စာနာထောက်ထားမှုအပြည့်ဖြင့် လာရောက်လှူဒါန်းကြသည့် ဌာနဆိုင်ရာများ၊ စေတနာရှင်အလှူရှင်များ၊ အဖွဲ့အစည်းများအားလုံးကို ကျေးဇူးအထူးတင်ရှိကြောင်း ပြောကြားခဲ့သည်။

          ထို့နောက် တိုင်းဒေသကြီး ဝန်ကြီးချုပ် ဦးမျိုးဆွေဝင်းထံသို့ စေတနာရှင်အလှူရှင်များ၊ ဌာနဆိုင်ရာ များ၊ အဖွဲ့အစည်းများက အလှူငွေများ ပေးအပ်လှူဒါန်းခဲ့ရာ ဂုဏ်ပြုမှတ်တမ်းလွှာ အသီးသီးပြန်လည်ပေး အပ်ခဲ့သည်။

          ပဲခူးတိုင်းဒေသကြီးအစိုးရအဖွဲ့သို့ ယနေ့လာရောက်လှူဒါန်းခဲ့သည့် စေတနာရှင်အလှူရှင်များ၊ ဌာနဆိုင်ရာများနှင့် အဖွဲ့အစည်းအသီးသီးတို့မှ ငွေကျပ်(၁၇၈၁၁.၅)သိန်း ပေးအပ်လှူဒါန်းခဲ့ခြင်းဖြစ်ပြီး ငလျင်ဘေးဒဏ်သင့်ဒေသများ၌ ကူညီကယ်ဆယ်ရေးနှင့် ပြန်လည်ထူထောင်ရေးလုပ်ငန်းများတွင် အသုံးပြု သွားမည်ဖြစ်ကြောင်း သတင်းရရှိသည်။