တိုင်းဒေသကြီး ဝန်ကြီးချုပ် ပဲခူးတိုင်းဒေသကြီး(အနောက်ခြမ်း) သန့်ရှင်းသာယာလှပစေရေး ကွင်းဆင်း ကြည့်ရှုစစ်ဆေး

ပြည် အောက်တိုဘာ ၈
=================

ပဲခူးတိုင်းဒေသကြီးအစိုးရအဖွဲ့၊ ဝန်ကြီးချုပ် ဦးမျိုးဆွေဝင်းသည် အောက်တိုဘာလ(၈)ရက်နေ့၊ နံနက်ပိုင်းက ပဲခူးတိုင်းဒေသကြီး(အနောက်ခြမ်း) သန့်ရှင်းသာယာလှပစေရေး ကွင်းဆင်းကြည့်ရှုစစ်ဆေး ခဲ့သည်။
ရှေးဦးစွာ တိုင်းဒေသကြီး ဝန်ကြီးချုပ်နှင့်အဖွဲ့သည် ပြည်မြို့တွင်းရှိ ဗိုလ်ချုပ်လမ်းနှင့် ရန်ကုန်-ပြည် ကားလမ်းတစ်လျှောက် လမ်းဘေးဝဲယာ သန့်ရှင်း ရေးပြုလုပ်နေသည့် ဌာနဆိုင်ရာများ၊ ဒေသခံပြည်သူများ၊ တပ်ရင်း/တပ်ဖွဲ့များ အား ကြည့်ရှုအားပေးခဲ့သည်။
ထို့နောက် တိုင်းဒေသကြီး ဝန်ကြီးချုပ်နှင့်အဖွဲ့သည် နတ်တလင်းမြို့ အထွေထွေရောဂါကု ပြည်သူ့ ဆေးရုံကြီးသို့ ရောက်ရှိခဲ့ပြီး ဆေးရုံတက်လူနာများအား ရင်းရင်းနှီးနှီးတွေ့ဆုံအားပေးစကား ပြောကြား ခဲ့ကာ ကျန်းမာရေးဝန်ထမ်းများအတွက် သီးခြားထောက်ပံ့ငွေကျပ်(၅)သိန်း ထောက်ပံ့ပေးအပ်ခဲ့ပြီးနောက် ဆေးရုံ တိုးချဲ့ဆောက်လုပ် နိုင်ရေး ကြည့်ရှုစစ်ဆေးခဲ့ပြီးနောက် နတ်တလင်းမြို့၊ မြို့မရပ်ကွက်တွင် ပဲခူးတိုင်း ဒေသကြီးအစိုးရအဖွဲ့မှ အကောင်အထည်ဖော် ဆောင်ရွက်ပေးခဲ့သည့် မိုးလုံလေလုံဖူဆယ်ဘောလုံးကွင်း၊ အလေးမခန်းနှင့် ကြက်တောင်ကွင်းတို့အား ကြည့်ရှုစစ်ဆေးခဲ့ပြီး ပြင်ဆင်ထိန်းသိမ်းခြင်းလုပ်ငန်းများအား စဉ်ဆက်မပြတ် ဆောင်ရွက်သွားရန်နှင့် အားကစားကွင်း ဝင်/ထွက်လမ်းများ ကောင်းမွန် စေရေး ဆောင်ရွက်ရန် တာဝန်ရှိသူများအား လမ်းညွှန်မှာကြားခဲ့သည်။ ၎င်းနောက် တိုင်းဒေသကြီး ဝန်ကြီးချုပ်နှင့်အဖွဲ့သည် နတ်တလင်းဘူတာအား သွားရောက်ကြည့်ရှုစစ်ဆေးခဲ့ပြီး ရန်ကုန်-ပြည် မီးရထားခရီးစဉ်အား အဆင့်မြှင့်တင်တော့မည်ဖြစ်၍ ဘူတာအတွင်းအပြင် သန့်ရှင်းသပ်ရပ်စေရေး ဆောင်ရွက်ရန်နှင့် ဆိုလာမီးလုံးများ တပ်ဆင်အသုံးပြုရန် တာဝန်ရှိသူများအား လမ်းညွှန်မှာကြားခဲ့သည်။
ဆက်လက်၍ တိုင်းဒေသကြီး ဝန်ကြီးချုပ်နှင့်အဖွဲ့သည် သာယာဝတီမြို့နယ်၊ သင်တောရိုးကျေးရွာအုပ်စုရှိ မိုးစပါး(၂)သီး စိုက်ပျိုးအောင်မြင်ဖြစ်ထွန်းနေမှုအား ကြည့်ရှုစစ်ဆေးခဲ့ပြီး တစ်နှစ်(၃)သီး စိုက်ပျိုးနိုင်ရန် သက်တမ်းတိုသည့် ပဲတီစိမ်း မျိုးကောင်းမျိုးသန့်များ ရရှိနိုင်ရေး၊ သွင်းအားစုများ အချိန်မီရရှိစေရေး၊ စိုက်ပျိုးရေး လုံလောက်စွာရရှိစေရေးနှင့် သဘာဝမြေဩဇာ များ ကိုယ်တိုင်ပြုလုပ်သုံးစွဲနိုင်ရေး အသိပညာပေး ဆောင်ရွက်ရန် တာဝန်ရှိသူများအား လမ်းညွှန်မှာကြားခဲ့သည်။
ထို့နောက် တိုင်းဒေသကြီး ဝန်ကြီးချုပ်နှင့်အဖွဲ့သည် သာယာဝတီမြို့နယ်၊ သုံးဆယ်မြို့ရှိ အာကာစံပြ စိုက်ပျိုးမွေးမြူရေးခြံသို့ ရောက်ရှိခဲ့ပြီး ဒေသနွားမျိုးနှင့် ဘရာဗင်နွားမျိုးစပ်၍ အသားစားနွား မွေးမြူထားရှိမှုအား ကြည့်ရှုစစ်ဆေးခဲ့ပြီး တိရစ္ဆာန်အစာအဖြစ် နေဗီယာမြက် စိုက်ပျိုးကျွေးမွေးရန်၊ တိရစ္ဆာန်ရောဂါ ကျရောက်မှုမရှိစေရေး ကာကွယ်ဆေးများ အချိန်မီထိုးနှံပေးရန်၊ ဒေသထွက်ကုန် များဖြင့် တိရစ္ဆာန်အစာများ ထုတ်လုပ်နိုင်ရေး အသိပညာပေး ဆောင်ရွက်ရန် တာဝန်ရှိသူများအား လမ်းညွှန်မှာကြားခဲ့ကြောင်း သတင်းရရှိသည်။