ပဲခူးတိုင်းဒေသကြီး အစိုးရအဖွဲ့ Bago Region Government – Official Website
ပဲခူး မတ် ၁၁
======================
ပဲခူးတိုင်းဒေသကြီးအစိုးရအဖွဲ့၊ ဝန်ကြီးချုပ် ဦးမျိုးဆွေဝင်းသည် အစိုးရအဖွဲ့ဝင် ဝန်ကြီးများ နှင့် ဌာနဆိုင်ရာများလိုက်ပါလျက် မတ်လ(၁၁)ရက်နေ့၊ နံနက်ပိုင်းက ပဲခူးမြို့တွင်း အေးချမ်းလုံခြုံစွာ တက္ကသိုလ် ဝင်တန်း(Grade-12) စာမေးပွဲဖြေဆိုနေမှုများအား သွားရောက်ကြည့်ရှု အားပေးခဲ့သည်။
ရှေးဦးစွာ တိုင်းဒေသကြီး ဝန်ကြီးချုပ်နှင့်အဖွဲ့သည် ပဲခူးမြို့၊ အမှတ်(၁)အခြေခံပညာအထက်တန်း ကျောင်းသို့ ရောက်ရှိခဲ့ပြီး ကျောင်းသား/ကျောင်းသူများ စိတ်အေးချမ်းသာစွာ တက္ကသိုလ်ဝင်တန်း(Grade-12) စာမေးပွဲ ဖြေဆိုနေမှုများအား သွားရောက် ကြည့်ရှုအားပေးခဲ့ရာ တိုင်းဒေသကြီးပညာရေးမှူးမှ တက္ကသိုလ် ဝင်တန်း စာမေးပွဲဖြေဆိုနေမှု အခြေအနေများအား လိုက်လံရှင်းလင်းပြသခဲ့မှုအပေါ် တိုင်းဒေသကြီး ဝန်ကြီးချုပ်က တက္ကသိုလ်ဝင်တန်း စာမေးပွဲအား မသမာမှုကင်းရှင်းစွာ ဖြေဆိုနိုင်ရေး၊ ကျောင်းကျန်းမာရေး များ စနစ်တကျထားရှိသွားရန်နှင့် စည်းကမ်းပြည့်ဝ၍ တည်ငြိမ်အေးချမ်း ချောမွေ့အောင်မြင်စွာ ကျင်းပပြီးစီး နိုင်ရေး ပူးပေါင်းဆောင်ရွက်ရန် တာဝန်ရှိသူများအား လမ်းညွှန်မှာကြားခဲ့သည်။ ၎င်းနောက် တိုင်းဒေသကြီး ဝန်ကြီးချုပ်နှင့်အဖွဲ့သည် ပဲခူးမြို့နယ်၊ အင်းတကော်မြို့၊ အခြေခံပညာအထက်တန်းကျောင်းသို့ သွားရောက်၍ ကျောင်းသား/ ကျောင်းသူများ စိတ်အေးချမ်းသာစွာ တက္ကသိုလ်ဝင်တန်း(Grade-12) စာမေးပွဲ ဖြေဆိုနေမှုများ အား သွားရောက်ကြည့်ရှုအားပေးခဲ့ပြီး ကျောင်းလွှတ်ချိန်၌ တာဝန်ရှိသူများက ကျောင်းသား/သူများအား အအေးနှင့်မုန့်များ ပေးဝေခဲ့ကြသည်။
ပဲခူးတိုင်းဒေသကြီးအတွင်း ပဲခူးခရိုင်တွင် စာစစ်ဌာန(၆)ခု၊ ဖြေဆိုသူဦးရေ(၂၁၃၆)ဦး၊ ညောင်လေးပင် ခရိုင်တွင် စာစစ်ဌာန(၁၀)ခု၊ ဖြေဆိုသူဦးရေ(၂၂၄၂)ဦး၊ တောင်ငူခရိုင်တွင် စာစစ်ဌာန(၁၈)ခု၊ ဖြေဆိုသူဦးရေ (၃၁၁၁)ဦး၊ ပြည်ခရိုင်တွင် စာစစ်ဌာန(၁၆)ခု၊ ဖြေဆိုသူဦးရေ(၂၀၈၉)ဦး၊ သာယာဝတီခရိုင်တွင် စာစစ်ဌာန (၂၀)ခု၊ ဖြေဆိုသူဦးရေ(၂၃၄၅)ဦး၊ နတ်တလင်းခရိုင်တွင် စာစစ်ဌာန(၉)ခု၊ ဖြေဆိုသူဦးရေ(၁၅၅၆)ဦးရှိပြီး စုစုပေါင်း စာစစ်ဌာန (၇၉)ခု၌ ဖြေဆိုသူဦးရေ(၁၃၄၇၉)ဦး အေးချမ်းလုံခြုံစွာဖြင့် တက္ကသိုလ်ဝင်တန်း (Grade-12) စာမေးပွဲအား ဖြေဆိုလျက်ရှိကြောင်း သတင်းရရှိသည်။