တိုင်းဒေသကြီး ဝန်ကြီးချုပ် ဦးမျိုးဆွေဝင်း လယ်ယာသုံးစက်ကိရိယာ မောင်းနှင်ထိန်းသိမ်းမှု(အထူး) သင်တန်းအမှတ်စဉ် (၃/၂၀၂၆-၂၀၂၇) သင်တန်းအား တက်ရောက်ဖွင့်လှစ်

ပဲခူး အောက်တိုဘာ ၆

          ပဲခူးတိုင်းဒေသကြီး ဝန်ကြီးချုပ် ဦးမျိုးဆွေဝင်းသည် အစိုးရအဖွဲ့ တာဝန်ရှိသူများနှင့်အတူ ယမန်နေ့၊ နံနက်ပိုင်းက ပဲခူးမြို့နယ်၊ ဘုရားကြီးမြို့ စက်မှုလယ်ယာသင်တန်းကျောင်း၌ ကျင်းပပြုလုပ် သည့် လယ်ယာသုံးစက်ကိရိယာ မောင်းနှင်ထိန်းသိမ်းမှု(အထူး)သင်တန်း အမှတ်စဉ် (၃/၂၀၂၆-၂၀၂၇) သင်တန်း ဖွင့်ပွဲ အခမ်းအနားသို့ တက်ရောက်ခဲ့သည်။

          ရှေးဦးစွာ တိုင်းဒေသကြီး ဝန်ကြီးချုပ် ဦးမျိုးဆွေဝင်းက ပဲခူးတိုင်းဒေသကြီးသည် စိုက်ပျိုးရေးနှင့် မွေးမြူရေးကို အခြေခံသည့် တိုင်းဒေသကြီးတစ်ခုဖြစ်ပြီး စိုက်ပျိုးသီးနှံအလိုက် ပန်းတိုင်အထွက်နှုန်း ရရှိရေး၊ လယ်ယာကဏ္ဍဖွံ့ဖြိုးတိုးတက်ရေး၊ တောင်သူလယ်သမားများ၏ လူမှုစီးပွားဘဝများ ဖွံ့ဖြိုး တိုးတက်ရေးတို့အတွက် စက်မှုလယ်ယာကူးပြောင်းရေးသည် မဖြစ်မနေ ဆောင်ရွက်ရမည့်လုပ်ငန်း တစ်ရပ်ဖြစ်သကဲ့သို့ လယ်ယာလုပ်ငန်းခွင်တွင် လက်တွေ့လုပ်ကိုင် ဆောင်ရွက်နေသည့် တောင်သူ လယ်သမားများ ပူးပေါင်းပါဝင်မှာသာ အချိန်တိုအတွင်း အောင်မြင်နိုင်မှာဖြစ်ကြောင်း၊ စက်မှု လယ်ယာ ကူးပြောင်းရေး ဆောင်ရွက်ရာမှာ အဓိကအရေးပါသည့် တောင်သူလယ်သမား မျိုးဆက်သစ်များအား လယ်ယာသုံးစက်ကိရိယာမျိုးစုံ မောင်းနှင်ခြင်း၊ ထိန်းသိမ်းခြင်းဆိုင်ရာများကို စာတွေ့/လက်တွေ့ ပေါင်းစပ် သင်ကြားပို့ချသွားမှာဖြစ်၍ စိုက်ပျိုးရေးကဏ္ဍအတွက် ပိုမိုအကျိုးဖြစ်ထွန်းလာမှာဖြစ်ကြောင်းနှင့် သင်တန်း မှ စနစ်တကျ တတ်မြောက်လာမည့် အတတ်ပညာများကို မိမိတို့မိတ်ဆွေအသိုင်းအဝိုင်းများကို လက်ဆင့် ကမ်းမျှဝေပေးခြင်း၊ လက်တွေ့အသုံးချခြင်းတို့ဖြင့် မိမိရပ်ရွာဒေသဖွံ့ဖြိုးရေးနှင့် နိုင်ငံတော်၏ လယ်ယာ ထုတ်ကုန် တိုးတက်မြင့်မားရေးအတွက် ကိုယ်စွမ်းဉာဏ်စွမ်းရှိသမျှ ကြိုးစားလေ့လာသင်ကြား သွားကြစေ လိုကြောင်း ပြောကြားခဲ့သည်။

          ထို့နောက် ဘုရားကြီးမြို့ စက်မှုလယ်ယာသင်တန်းကျောင်း၊ ကျောင်းအုပ်ကြီးက သင်တန်းကျောင်း ဆိုင်ရာ အချက်အလက်များအား Power Point ဖြင့် ရှင်းလင်းတင်ပြခဲ့သည်။ ၎င်းနောက် တိုင်းဒေသကြီး ဝန်ကြီးချုပ်သည် သင်တန်းသားများအား ရင်းရင်းနှီးနှီး လိုက်လံနှုတ်ဆက်ခဲ့ကာ သင်တန်း၌ စာတွေ့ သင်ကြားမည့် ဘာသာရပ်ဆိုင်ရာ စာအုပ်များအား လှည့်လည်ကြည့်ရှုခဲ့သည်။

          အဆိုပါ လယ်ယာသုံးစက်ကိရိယာ မောင်းနှင်ထိန်းသိမ်းမှု(အထူး) တောင်သူသင်တန်း အမှတ်စဉ် (၃/၂၀၂၆-၂၀၂၇)တွင် ပဲခူးတိုင်းဒေသကြီးမှ(၃၉)ဦး၊ ဧရာဝတီတိုင်းဒေသကြီးမှ(၇)ဦး၊ ရန်ကုန်တိုင်း ဒေသကြီးမှ(၁)ဦး၊ မန္တလေးတိုင်းဒေသကြီးမှ(၁)ဦး၊ မွန်ပြည်နယ်မှ(၂)ဦး၊ ကရင်ပြည်နယ်မှ(၁)ဦး စုစုပေါင်း သင်တန်းသား(၅၁)ဦးတို့အား လက်သုံးကိရိယာ၊ လုပ်ငန်းခွင်အန္တရာယ် ကင်းရှင်းရေး၊ ထွန်စက်ကြီး၊ Engine System, Clutch & Transmission, Front Axle, Steering& Drive Line, Rear Wheel Drive & Brake System, PTO & Hydraulic, Electrical System, Driving Method, Maintenance & Repair ထွန်ယက်ကိရိယာများ၏ အခြေခံသဘောတရားနှင့် ထွန်ယက်နည်းများကို စာတွေ့/လက်တွေ့ သင်ကြား ပို့ချပေးသွားမှာဖြစ်ကာ ယင်းသင်တန်းသားများတွင် သတ်မှတ်စစ်မှုထမ်းကာလပြီးမြောက်ခဲ့သော ပြည်သူ့စစ် အမှတ်စဉ်(၁)မှ လူငယ်များ ပါဝင်တက်ရောက်လျက်ရှိကြောင်း သတင်းရရှိသည်။